عيد اضحي سعيد

كل سنة وانتم طيبين ويارب عيد اضحي سعيد علي الكل
بالنسبة لي عيد الاضحي من اسعد الايام اللي بقضيها طول السنة لانه بيحصل فيه حدث مهم او زي عادة اتعودنا عليها من صغرنا زي النهاردة من كل سنة بنروح نقضي اليوم عند عمتي وعمتي اي حد يشوفها يحس فيها برائحة الناس الطيبين بتوع زمان ومع انها كبيرة في السن الا انها بتصر تعملنا الاكل بايديها وعلي سطح البيت بنتجمع كلنا حوالين عمتي وهي بتشوي اللحمة والكفتة بالطرب الخاصة بيها بتتبيلتها المشهورة بيها ونستجيب لطلبات بابا لما يصمم يعمل السلطة والطحينة حفظنا كلمته لما يدخل مطبخ عمتو "هو المطبخ ده مش بترتبوه ابدا"الغريبة اني بعشقه وهو مقلوب راسا علي عقب ناكل ونصنا واقفين مش لاقيين كراسي بس فرحانين بدفي اللمة ونحبس بالشاي المعمول علي الفحم وطبعا بنكون محضرين العاب نارية بنفرقعها في السما زي الاطفال كاننا في حفلة خمس نجوم ونعاكس في الاطفال احفاد عمتو ونموت من الضحك علي جني الصغيرة وهي بتلف الطرحة وتصلي وتقول كلمات حفظتها من سورة الفاتحة وهي بتقلد مامتها ساعات بتمر عليه بسرعة زي كل اوقات السعادة مش بصحي منها غير وبابا بيناديني ان الاوان نمشي اقوم وانا متضررة لاني وكل مرة برده بكون في نقاش عميق دايما مع بنات عمتي واقوم مع وعد مني ومنهم اننا نتقابل قريب ونكمل كلامنا لكن دائما لا بنتقابل قريب ولا بنكمل كلامنا وبتلهينا دنيتنا لحد ما تجمعنا اي مناسبة تانية بس هيفضل عيد الاضحي عندي هو قعدتنا سوا لمتنا كلنا علي الاكل ضحكنا ورائحة الناس الطيبة ومش كل يوم ممكن تحس بده انا حبيت اشاركم يوم من اسعد ايام حياتي ..كل سنة وانتم طيبين